尋日有網民發現，國際足協（FIFA）網站，喺香港「國家簡介」(country info)「官方名稱」（official name）一欄，寫咗「香港特別行政區」嘅普通話拼音「Xianggang Tebie Xingzhengqu」，唔通香港人第日要話自己「I come from XG」？有網民就發起一人一電郵向國際足協投訴，要求將香港官方英文改番做HKSAR。
至於澳門，佢嘅「官方名稱」亦變成「Aomen Tebie Xingzhengqu」，不過澳門葡文名就仍然得以保留，難怪班網民會嘆息香港「連馬交都不如」。
睇番其他國家或者地區嘅簡介，部分地方嘅官方名稱一欄都係就咁填當地語言譯音，例如日本嘅「官方名稱」就係Nihon Koku，但唔知點解，中華台北嘅官方英文就正正常常係「Chinese Taipei」。喺香港嘅資料裏面仲話香港首都係Victoria即係維多利亞，睇嚟國際足協係無知多於一切喎。