政情：陳強吼實少數族裔票倉
一直盛傳有一名來自新界西嘅商人嚟緊九月會參加立法會選舉，呢位商人早排終於曝光，佢個名叫陳強，係早排先成立嘅城鄉會會長。名字比預期早咗見街，不過似乎就冇嚇窒到，陳強尋日特登喺自己地頭元朗，為少數族裔市民搞跆拳道活動。
陳強目標定喺新西，關注少數族裔其實絕對啱數，無他嘅，因為天水圍正正就住咗極多來自印、巴或者尼泊爾嘅市民，好多已經住滿七年係永久居民，甚至喺香港出世，早就有資格投票選立法會議員，其他政黨又甚少投放資源落佢哋度喎，所以個票倉其實好大。
有陳強身邊人就同我哋講，佢哋其實早喺○二年已經喺新界西為少數族裔提供服務，以佢本人個名命名嘅陳強社區協會仲已經喺天水圍、元朗、屯門、荃灣同葵青開咗辦事處，範圍比某啲現任立法會議員仲要廣，到底佢有冇機會贏？咁就要睇嚟緊幾個月有乜出位招數喇！