政情：街工民協明射白鴿
九月立法會選舉如箭在弦，各黨派都對由區議員晉升立法會、即係所謂區議會超級議席虎視眈眈，民主黨早前開會後決定採用「舊人帶新人」嘅策略，派出現任立法會議員涂謹申同尹兆堅出戰，已經無再整色整水搞泛民協調。但泛民黨派中，街工、民協同公民黨等都考慮緊派人出選。佢哋咁不自量力，無非要提醒民主黨不能目中無人，要主席何俊仁唔好咁舒服，順便提高埋自己嘅知名度咁囉。
黃潤達借票 困難重重
街工方面，由於梁耀忠諗住喺新界西選埋呢屆就唔選，黨內最有實力接班嘅都係得黃潤達一個。為扶助黃潤達上位，阿忠叫黃潤達參選區議員超級議席。黃潤達雖然喺葵青區略有名氣，但全港知名度就相對較低，如何能迅速提高佢知名度？去選區議會超級議席係一個方法。如何能有足夠嘅區議員提名？成個街工只得五個區議員，咪要去借將囉，問邊個借？民主黨囉。
黃潤達透露，街工曾經接觸過部分民主黨區議員，但據聞部分人對借票畀街工入閘嘅建議覺得有啲尷尬，因為借票畀街工就會影響民主黨第二梯隊勝出嘅機會，而手握八票嘅新民主同盟至今仍然「猶抱琵琶半遮面」，仲未肯講會將啲票借畀街工定公民黨。如果街工攞唔到新同盟嘅票，又爭取唔到廿幾個獨立區議員嘅支持，街工基本上就可以話參選無望，更加唔使講話贏。
其實選超級議席係要喺全港不分選區咁攞票，工程好大，一啲都唔簡單，工聯會都話要開動個風車啦。街工如果真係想捧紅黃潤達，仲有一個辦法嘅，建議梁耀忠喺新界西出選時自己排第二，畀黃潤達排第一，咁就包保黃可以一炮而紅嘞。
另一邊廂，民協已初定派馮檢基選超級議席，當然亦唔太想民主黨派兩人參選，因為有人覺得既然泛民最多可以喺「六四黃金比」下攞到三個議席，平均分畀各泛民黨派理應就係最理想嘅做法。有人仲對民主黨口就話協調，但實則早已派人參選嘅做法略有微言。鷸蚌相爭漁人得利嘅古仔大家都聽過，不過利益當前，都唔理得咁多。