中環出更：試食兩箱 高永文好「柑」
本身係「潮州冷」嘅著名骨科醫生高永文，經常瞓身宣揚潮州美食同文化，佢唔止一次勁讚潮州蕉柑味道一流，早前潮州商會副會長胡劍江（Michael）就忽然送贈兩箱蕉柑畀佢。
原來Michael諗住學種蕉柑，於是搵高醫生試食，試啱後決定喺內地種植五百棵，最快要三年後先至有收成。
估唔到一個柑令到兩個大男人咁瘋狂，身為百年老店胡良利珠寶後人嘅Michael就笑稱，自己本業做金，但走去種柑，全憑一股承傳潮汕文化嘅傻勁。佢勁讚蕉柑無核、無渣又清甜，好值得代代相傳。經朋友介紹下，輾轉喺潮陽搵到呢種蕉柑，播種之前特登搵高醫生試食，咁就包保係柑中極品喇！
Michael已買入五百株柑苗，預計本月底喺廣東與廣西交界嘅雲浮市鬱南縣農場播種。唔知呢隻胡氏蕉柑上市時，會否用高醫生個嘜頭做生招牌呢？