領匯商場累客仆崩嘴
領匯轄下商場暗藏絆人陷阱，善後工作竟「慢三拍」！屯門良景商場進行資產提升工程期間，連接巴士總站的通道由平路變成地台，在缺乏足夠警示下，不少居民相繼「中伏」跌倒，經市民多番要求，領匯竟拖延至今年六月才加設斜道。區議員狠批領匯效率之低令人難以接受，要求盡快開展有關工程，避免再有意外發生。
七十多歲的張伯與妻子日前清晨時分經商場前往良景巴士總站，當時張伯見巴士正在上客，隨即上前追趕，因未有察覺「突然出現」的地台而不慎踏空，手部擦傷、嘴角流血更需縫針，「我喺度住咗十幾廿年，嗰度一直都冇地台，我哋啲舊街坊行慣咗，一個唔小心就跌親！」張伯不滿有關地台並無實際作用，至於地面黃線及一張「蚊型」警示標貼則毫不起眼，變成絆人陷阱，「個警告貼喺地下，細細張咁，邊個睇到？分明就係陷阱！」
加設斜道補鑊太遲
領匯發言人指出，屯門良景商場地下近便利店位置早前進行翻新地台及鋪設防滑磚工程，地台邊已加貼黃線，場內亦有張貼「小心梯級」告示，以提醒行人。發言人又稱，上址現正開展加設斜道工程，預計可於今年六月下旬竣工。為方便市民進出商場，領匯已分階段進行工程及作出適當規劃，現時上址同層亦有兩條斜道開放予市民使用。
對斜道要多個月後才能竣工，張伯坦言不能接受，「我退休之前都係做建築，以我所知，整一條斜道係好簡單嘅事，幾個人做，一、兩日就搞掂，唔明點解領匯整條斜道都可以整咁耐！」張伯擔心施工期間再有居民跌倒受傷，「呢度好多小朋友同老人家出入，好彩我身子唔錯就冇事啫，弱啲嘅老人家跌親就可大可小，有咩事係咪領匯負責？」
「領匯要開放咗通道先逐步加番啲黃線同警示，分明就係補鑊，條斜道就到依家都未整到，好明顯係之前嘅規劃有問題！」屯門區區議員李洪森透露，曾多次要求領匯在地台加設斜道及警示，惟不得要領，不滿對方處事「慢吞吞」，漠視居民安全。李又指商場鄰近巴士站與民居，人流多，要求領匯須顧及居民安全，盡快完成斜道工程，「商場提升工程會喺今年第二季完成，六月應該係工程尾聲，點解加條斜道要最後先做？咁耐以嚟已經有唔少人跌親，領匯唔可以再拖！」
記者：陳倩儀