考考大家，知唔知邊個大官有權過問閣下嘅「生老病死」？理論上當然係曾蔭權啦，之不過呢一個視民望如浮雲嘅蠱惑特首，早就放棄做好呢份工，淨係黐實富豪貪威識食。如果你答食物及衞生局局長周一嶽，證明你係關心時事嘅有識之士。
冇錯，周局長嘅管轄範圍非常廣泛，由生到老，由病到死，統統都由佢揸莊。問題係，揸莊揸得好就話福為民開啫，揸得唔好甚至揸流攤，咁就生老病死都受盡折磨。遠嘅唔講，係咁意睇睇清明節，最頭痛嘅問題係乜呀？死無葬身之龕！
周一嶽周身刀冇張利，生老病死樣樣關佢事，無可奈何事事冇料到。長期無法解決龕位不足已經令人不耐煩啦，家陣連火化遺體都出事。鑽石山火葬場嘅燒屍服務供不應求，食環署同機電署秘密增加火化節數，結果搞到超時燒屍，公然違反環保署規定，鄰近三萬居民被迫喺晚餐時間「燒屍臭味撈飯」。
根據環境許可證規定，火葬場唔可以喺每日上午九時半至晚上七時半以外時間燒屍。超時燒屍都算嘞，最慘係飄出擾民嘅臭味吖嘛。喂，鑽石山火葬場嘅火化爐系統號稱無毒、無色同無味，飄出臭味係咪代表壞機？會唔會釋放污染物質威脅居民健康？如果真係火化爐壞機，即係周一嶽又監管不力。
另一件事亦要算到周局長頭上，街市居然出現長煮難熟又長放不腐嘅「化妝牛肉」。呢一種外表呈現螢光紅嘅騎呢牛肉，懷疑有人非法添加防腐劑，以確保牛肉擁有新鮮賣相，市民隨時食到肝腎受損甚至腦膜發炎。食環署接獲本報投訴之後，先至抽走化妝牛肉攞去化驗。即係咁，若然周一嶽唔係把關不力發雞盲，香港唔會久不久就有問題食品流入市面。萬一病從口入，睇醫生都係問題，因為周局長管轄之下嘅醫療系統千瘡百孔，醫護人手短缺造成不少失誤個案，害到病人雞毛鴨血甚至一命嗚呼。
周一嶽有個響噹噹嘅花名周一鑊，周周孭一鑊咁解。計功夫茶話齋，不如索性改名叫做周一落，意思係過咗周一就要落台執包袱，唔好阻住地球轉。
嗱嗱嗱，特區政府好快就夠鐘換班，曾蔭權收工，梁振英開工，籌組治港新班子係一件大事。假如一個唔覺意，幾年以來搞到香港人生老病死都受盡折磨嘅周一嶽仍然在位，點算好呢？所以咯喎，真係有必要改名叫做周一落，保證周局長唔落台唔得。記住，政府換屆之期七月一日係周日，周一落台剛剛好。總而言之，踢走局長周一落！