政情：陳祖澤夠樂觀 無中年危機
古語有云四十而不惑，不過現代人嘅生活複雜得多，唔少人到四十歲就開始出現中年危機。年近七十嘅前馬會主席陳祖澤（John）好好彩，佢話人到中年都無出現過危機，佢仲勉勵步入中年嘅人，只要保持樂觀同上進心，自然免疫於中年危機。
專門幫助四十歲以上嘅40+協會，尋日展開今個年度四十歲以上典範人士提名。身為評審團主席嘅阿John向大家分享經驗，佢比喻人生好似一場比賽，去到四、五十歲正好係中場休息階段，身心都開始走下坡，容易出現疲憊、恐懼，所以佢想幫手選出一啲榜樣畀四十歲以上嘅人。
至於阿John自己呢？佢笑笑口話託賴人生無乜危機，五十歲後離開政府、入職九巴，六十幾歲仲做埋馬會主席，不斷有機會磨練自己。
被問到會唔會加入下屆政府，阿John即刻擰頭話，佢嘅人生已經進入加時階段，只能夠以其他方式，服務社會。