本身係大律師、但因為做舞台劇打出名堂嘅公民黨立法會議員陳淑莊（Tanya），下個月尾準備重踏台板，獻出第一次化身「戴錯嘢夫人」搞talk show。今年九月立法會就改選，Tanya仲有時間做騷，係咪搵定後路先？
Tanya尋日約齊成班傳媒話有好消息宣布，大家萬分期待，以為佢覓得第二春，實情係佢宣布下個月廿五至廿七日，喺灣仔藝術中心壽臣劇院開騷。
Tanya有感要講政治嘢，唔一定得立法會一個平台，亦唔係政界中人先可以論政，所以想「做番一啲我想做嘅嘢」，唔通議員唔係佢想做嘅？
呢場騷全部由Tanya一個人構思，除咗搵「人山人海」主辦，新進rap歌手Masta Mic幫拖，仲有電台節目主持曾志豪做拍檔。Tanya話有錢賺就全部捐畀護苗基金，所以個騷除咗會講佢自己同政治之外，亦會講吓婦女同小朋友，不過佢嘅拍檔就爆響口話，唔知Tanya係咪想唔做議員，重操故業。其實Tanya已經喺黨內報名再參選立法會，不過選唔選到就要睇選民喇！