政情：舊政總西座 解渴靠水煲
隨着政府部門遷入添馬艦，位於下亞厘畢道嘅舊政府總部已經變得冷清非常，加上門外一棵光禿禿嘅樹，如此畫面，盡見夕陽政府悲涼。不過，候任特首辦遷入舊政總後，舊政總西座地下嘅「玻璃房」再次重拾昔日風光，梁振英遷入後好多人出出入入，令呢個地方都活化咗。可惜今時唔同往日，皆因自從舊政總餐廳遷出後，依家連「玻璃房」部水機都唔知點解被撤去一個傳說中無人、無電嘅政總中座。
眼見水機比人更早撤退，西座僅餘嘅職員喊都無謂，只好出動水煲，自行煲水飲，但一個水煲又有幾大吖，所以即使面對涼水一杯嘅簡單要求，職員亦只好輕嘆愛莫能助。不過，經過尋日有傳媒向新聞處反映無水飲後，下午「玻璃房」忽然出現一把風馬牛不相及嘅風扇，觀乎候任特首辦會運作至六月底，睇嚟呢把風扇日後仍有大量「降溫」空間。