政情：李鋈麟 張德熙 趁機執平貨
郭氏兄弟捲入廉政風暴，導致新地股價大插水，好多投資者惟恐走避不及，紛紛拋貨離場。但係東華總理李鋈麟與張德熙都異口同聲，話新地係一間有實力同運作上軌道嘅公司，雖然受到醜聞困擾，但亦可能係入貨嘅大好機會。
李鋈麟話新地嘅股價跌咗咁多，目前係一個超平嘅入貨水平，所以打算由現價開始吸納，分五注入貨，總之價愈低就愈要買。李鋈麟認為新地土地儲備充足，資產豐厚，以一間咁有規模同實力嘅公司而言，係唔會因高層人事問題而影響日常運作，故此佢對新地嘅前途甚有信心，仲話如果呢個機會錯過咗，就可能買唔番咁話。
至於張德熙，就話目前並無持有新地股票，不過就有興趣趁低吸納。佢話早前因擔心內地宏調而睇淡香港股市，所以大幅減持，轉投喺谷底復甦嘅美股。不過佢見到新地嘅股價跌得咁急，倒覺得係一個危中有機嘅入市機會。