政情：民協A貨風車陣挺阿基
嚟緊九月立法會選舉，各個黨都對區議會超級議席虎視眈眈，諗住挾幾十萬票嘅民意以令天下！好似工聯會諗住用票后陳婉嫻出戰，並以「風車效應」利用嫻姐高人氣優勢，同五個直選選區候選人互相吸票，相得益彰。估唔到民協都諗住嚟套「風車效應」，軸心係馮檢基，新界西、九龍東同九龍西各派一人參戰，連多年無戰立法會嘅廖成利都要復出，今次民協用Ａ貨「風車效應」，轉唔轉得郁真係好令人懷疑。
民協新一屆換屆選舉，喺上周六悄悄地完成咗，一早已經放晒風話唔做主席嘅廖成利，竟然選擇「冧莊」再做一屆，因咩事搞到咁呢？佢就話自己接受咗個艱巨任務，所以不得不留喺民協喎。
新西九東搶灘凍過水
原來民協今屆立法會選舉打算衝出老巢深水埗，老虎仔（廖的稱號）要領軍到新界西出戰，副主席譚國僑負責留守九龍西，而資深區議員許錦成肩負九龍東搶灘重任。除咗譚國僑嗰席比較安全外，其餘兩人都係凍過水，當選機會一啲都唔高。
既然贏面唔大，點解仲要咁搏？原來要眾星拱照馮檢基。因為阿基會去選超級議席，佢深知超級議席要全港性樁腳，只得老巢九龍西嘅支持，實係選輸多過食飯，其他黨友好抵得諗，硬住頭皮開拓其餘幾區票源。
我哋粗略估計民協喺九龍西嘅基本盤，有差唔多四萬票，實力唔差，但新界西同九龍東係民協弱區，搶到盡都只係得三萬票左右，再夾埋其他無樁腳嘅新界東同港島區，加加埋埋都係得十萬票多啲啲，但政界估計要贏超級議席，最少都要幾十萬票至得，今次民協呢招真係兵行險着，分散晒資源幫阿基谷票，贏就當然光宗耀祖啦。如果阿基輸咗，其他地區危危乎，民協分分鐘一鋪清袋。
老虎仔捱義氣去開荒
最慘情都算係老虎仔，佢本人唔係未試過贏，但要數到十幾年前，九五年立法局直選，佢就贏過漂亮一仗，撼低民建聯曾鈺成入局，不過回歸後兩屆立法會選舉，都無功而還，上屆更索性唔選。今鋪復出又要去新界西做開荒牛，幫阿基做樁腳。睇嚟馮檢基無輪贏定輸，都要諗辦法報答呢個有情有義嘅好兄弟。
不過時間尚早，或者阿基只係想拋個方案出嚟講吓數呢。