中環出更：東華總理就職 粒粒皆星
東華新一屆董事局尋日喺上環總壇就職，新面孔輩出。「靈芝大王」陳宇齡太太陳文綺慧（Viola）接棒做主席。今屆總理班底陣容勁，包括娶咗「中國舒拉寶娃」晏紫嘅「玻璃大王」公子李聖根、亞洲金融總裁陳智思姪女陳曉鈴（Stephanie），仲有前東華總理陳妙蘭細妹陳蕙蘭（Joyce），粒粒皆星。
Viola人緣廣，就職禮上，九十一歲媽媽、奶奶及親友齊慶賀。Viola穿起紅裙，風騷滿場飛。原來佢前晚緊張到瞓唔着，心情high過出嫁，一度要發短訊向家姐求救。老公陳宇齡就拍心口叫老婆安心做公職，由佢一夫當關打理公司，仲游說歌星家姐陳美齡，稍後由東京返港獻唱，助弟婦籌款。
晏紫產後專心湊女
李聖根都同太太晒恩愛，產後兩個多月嘅晏紫，尋日一身黑衣撐老公，身形明顯回復纖瘦。問B女有否運動潛質，李聖根笑言未睇到。咁會否追個龍B？佢就話順其自然嘞。晏紫現時專心湊女，未諗過復出喎。
樣子甜美可人嘅總理Stephanie都係另一焦點。佢爸爸就係陳智思哥哥陳智文，即係潮州富商陳有慶孫女。Stephanie留學加州，返港後喺亞洲金融任職高級副總裁，閒來喜歡玩帆船，仲煮得一手美味法國菜添。
數美女總理，仲有身為營養師嘅Joyce，家族來頭不小。佢爸爸係著名建築師陳百強，三家姐陳妙蘭就係Viola阿嫂。文、陳兩家咁老友，當然要撐場。
實德環球集團董事馬陳家歡「升呢」做第五副主席，賭王千金何超蕸同佢情如姊妹，即時送上恭賀。
卓妮