提起秦皇，大家可能聯想到焚書坑儒；提起滿清，大家可能聯想到十大酷刑；提起領匯，大家又會聯想到乜嘢呢？嗯……等功夫茶估一估先……大家可能聯想到七個字：加加加加加加加！
冇錯嘞，領匯畀人嘅印象就係加租加租再加租，而且一加就係加到瘋狂嗰隻。遠嘅唔講吖，淨係睇睇最近嘅情況。集合沙田區大約二十個領匯商場及街市代表嘅沙田商戶大聯盟，收到區內商戶反映領匯續約加租，加租幅度高達五成至超過一倍，簡直飛擒大咬。商戶代表當然炮轟領匯啦，一味顧住賺到盡，不理商戶死活。所以咯喎，商戶大聯盟決定短期內發起簽名運動，如果領匯一意孤行拒絕降低加幅，將會發動全沙田區領匯商戶及檔戶罷市，到時預計一呼百應。
領匯起勢加租嘅後果顯而易見，小本經營者一係執笠大吉，一係蟬過別枝。有能力繼續做生意嘅通常係實力比較雄厚嘅財團，不過商品價格無可避免貴一截。於是乎，受害嘅係再買唔到平價貨嘅街坊街里。你知啦，領匯轄下嘅係屋邨商場，住得屋邨唔慌係富裕人家啦，買餸開飯自然百上加斤。
除咗瘋狂加租，領匯亦係剝削成性。領匯於四月一日起為旗下商場嘅外判服務合約更換外判承辦商，並且引入新制度，涉及一千五百名保安員生計。工會組織收到前線員工求助，會方發現領匯嘅新合約令到員工嘅薪金削減，工時反而增加，保安員權益受損。
領匯點解可以咁無良嘅呢？簡單咁講，先係政府無能，然後領匯無良，養肥咗一隻失控嘅大怪獸。職工盟曾經做過調查，結果顯示百分之七十八青少年希望下一任行政長官率領政府回購領匯。
講到呢度，功夫茶諗起一件事，梁振英未擊敗唐英年而成為下一任行政長官之前，曾經喺一個諮詢會之上兩次被問到，假如當選特首，會唔會回購領匯呀？當時嘅狼營主帥振英哥哥係咁講嘅，未睇過所有相關條文，未知是否有法理依據可回購領匯。不過梁振英提出，假如地點許可的話，不妨考慮喺公共屋邨範圍另建購物地點，為居民提供較廉價嘅日常用品，以應付領匯高昂租金引致物價上漲嘅問題。
好嘞，夕陽政府行將就木，七月一日打後梁振英就係香港最高決策者，功夫茶有一個要求，麻煩閣下真心誠意研究一下如何有效約束領匯呢一隻失控大怪獸。即係咁，梁振英一向畀人嘅印象係「既狼且辣」，咁嘅作風用於鎮壓平民就話唔好啫，用於打擊怪獸就好到不得了。家陣領匯加租咬街坊喎，煩請梁特首辣手打怪獸！