政情：梁美芬心思思上京過節
復活節到，又係出門旺季。立法會議員梁美芬心思思想上京，佢此行唔係見領導人，而係搵老公同囝囝。
梁美芬尋日一身紅噹噹現身沙田馬場，原來約咗馬會副主席葉錫安食晏。咁得閒，有原因嘅，佢兩個分別就讀中四及中三嘅囝囝，先後去咗北京參加學術交流。佢身為城大法律系院長嘅老公王貴國日內都上京公幹，佢慨嘆一個人留喺香港過節好孤獨，所以心思思上京玩兩日，同家人會合。
愛京城，仲有另一原因。話說梁美芬多年前曾留學北京人民大學讀政治。那些年，曾與同學踩單車去王府井大街食串燒牛肉，又去香山睇紅葉。最難忘係與同學參加「乞丐遊戲」，由北京玩到天津，期間佢靠擺地攤賣首飾，又幫旅店老闆洗碗賺宿費，雖然辛苦，但相當回味喎。