喺菜園村事件後，政府就好着意咁話要聽年輕人嘅聲音，但就淨係得個講字，青年事務委員會委員嘅成員一直都無大動作嘅年輕化，民政事務局局長曾德成唔知係咪臨尾先畀人鬧醒，終於搵咗個「九十後」加入青委會，尋日公布嘅新名單，終於有新成員只有二十二歲。
政府曾經畀人踢爆，包括青委會在內等幾個諮詢組織嘅非官方委員嘅平均年齡係四十七歲，如果三年係一個代溝，佢哋同班年輕人相隔嘅應該係鴻溝囉。可惜德成局長做嘢慢幾拍，政府臨換屆先忽然醒覺搵「九十後」加入青委會。
民政事務局尋日就公布青委會委任咗三個新嘅成員，包括有立法會議員霍震霆個仔霍啟剛、香港研究協會總幹事麥燕薇、同埋「九十後」青年蕭景威。
今年二十二歲嘅蕭景威曾經喺香港紅十字會協助籌備國際性青年高峰會議，都幾威水架。睇嚟今次年輕人終於都有機會發聲喇，唔知佢嘅意見可唔可以影響到大多數呢？