「幸福的家庭都是相似的，不幸的家庭各有各的不幸。」俄國大文豪托爾斯泰呢句名言，道盡家庭暴力受害人嘅無奈及辛酸。
本港家暴問題不斷惡化，部分個案更演變為滅門慘劇。唔講唔知，舊年全港涉及虐待配偶同子女嘅個案，合共約四千宗，而低收入人士聚居嘅社區，更成為家暴重災區。
開講有話，家家有本難唸的經。家庭糾紛成因各異，好難一概而論，但如果問題得到及時調解，家暴往往可以避免，悲劇亦唔會一再重演。呢方面，社福團體通常可以發揮「和事老」嘅作用，弊在和事老有心，官老爺無意，當局闊佬懶理不特止，仲處處設限，諸多留難。呢嗱，唔少規模較細嘅社福團體有意喺公共屋邨設立辦事處服務區內居民，協助調解家庭糾紛，防止家暴事件，點知處處碰壁，阻頭阻勢嘅，竟然係政府部門。
有婦女組織三年前獲捐款喺天水圍提供輔導服務，並透過社署推薦，多次向房署申請租用公屋非住宅單位開設辦事處，結果泥牛入海，直到撥款用完都冇消息。亦有社福團體希望進駐家暴高危社區，向房署申請租用單位不果，無奈之下，惟有喺食肆甚至公園聽服務對象傾訴。
人哋一心一意協助居民防止家暴，房署就一拖再拖審批歎慢板，搞到社福團體焗住要擔櫈仔、踎街邊做嘢，簡直係笑話。如果因為公屋資源緊張，巧婦難為無米之炊，房署咁做仲情有可原，但實情根本唔係呢回事。本報記者巡查咗天水圍、屯門、東涌、葵青同深水埗多個公共屋邨近二十個非住宅單位，係就係九成已經有人用緊，但租畀社福團體嘅得一個咁大把，其餘大部分竟然變咗屋邨辦事處放文件、雜物嘅「私家倉庫」，不知所謂，離晒大譜！
家暴無日無之，支援服務本來已經杯水車薪，嚴重不足，房署唔主動提供協助，仲生人霸死地，浪費寶貴嘅公共資源。講得難聽啲，咁唔止係麻木不仁，直情係家暴嘅幫兇。
正如社會學者話齋，房署應盡量協助社福團體喺屋邨提供服務，如果居民有事求助無門，問題惡化，最終會釀成悲劇。仲記得五年前天水圍倫常慘劇嗎？受害人報警，當局冇即時處理，錯過制止家暴嘅機會，最終一家四口慘死。事實證明，官僚真係害人不淺！
試問房署班官老爺，究竟仲要發生幾多家暴悲劇，搞出幾多悲情城市，你哋至肯伸出援手？