政情：工黨攞正牌撐「CY」
去年底成立嘅工黨，拖到前晚先至搞建黨黨慶大會，黨員個個着晒代表工黨嘅橙色制服，場面似曾相識，好似返番去候任特首梁振英（CY）當初嘅宣布參選大會咁。工黨主席李卓人就話，該黨黨員喺特首選舉前都唔敢着橙色衫，因為怕畀人話係「梁粉」喎，但依家唔使驚喇。阿人仲忽然自爆其實工黨入面滿布CY黨員，仲話就算高呼「支持CY」都無有怕喎。
阿人話，工黨除咗有佢卓人個英文名簡寫叫「CY」外，秘書長譚駿賢亦係叫「CY」，仲有個Cyd，即係工黨副主席何秀蘭。所以佢哋着晒橙色衫、高呼支持CY都冇問題喎。工黨建黨無耐，最需要嘅係經費，前晚建黨黨慶大家就攞咗唔少「珍藏」出嚟拍賣，阿Cyd連十年前「蟻聯」嘅T恤都攞埋出嚟賣，但加加埋埋成晚都係籌得十萬元，啱啱夠錢出糧咋。