候任特首梁振英（CY）大前日到訪元朗，同參與過流浮山飯局嘅元朗六鄉主席握手合照，但尋日CY到訪北區上水，就見唔到北區四鄉主席、包括有份出席飯局嘅上水鄉事委員會主席侯志強（侯強）蹤影。唔通侯強咁記仇、唔肯同CY大和解？原來侯強同唔到CY握手言和，幕後黑手係一向同北區鄉事派唔妥嘅民建聯北區支部。
前晚深夜我哋致電侯強，問佢點解咁小氣，唔趁CY到訪上水區時大家見面握手和解？侯強就話佢根本唔知CY去咗佢地頭。經過一輪調查，原來CY今次落上水係由民建聯負責安排行程，期間完全冇通知過北區鄉事派，唔似CY之前到元朗咁有叫埋元朗六鄉，今次事件令北區四鄉主席好氣憤，質疑民建聯故意「包起」CY獨佔鎂光燈。
對於流浮山飯局事件，侯強明顯唔想再多談：「人哋都做咗特首囉，你仲想我點？」佢強調鄉事派一向都愛國愛港，一定唔會因某人當選或唔當選就變身反對派喎。