白鴿黨立法會議員李華明一早講過唔選九月立法會，政界一直有傳佢可能係想幫唐英年打江山，以佢嘅交際手腕，要有一官半職唔會好難，但如今唐唐喺特首選戰中落敗，泛民主派應該無望加入政府。所以肥仔明最近就對外講，話自己九月後就會籌組公關公司，齊齊搵真銀。
白鴿黨中人，不乏同唐唐關係友好，例如副主席單仲偕就被委任做西九董事局成員，羅致光亦被委任入關愛基金，全部係有實權職位。肥仔明同唐唐更係老友鬼鬼，當年唐唐仲做緊立法會議員時，已經不時同肥仔明大傾紅酒經，如果唐唐得勢，肥仔明做官都唔係無可能。
不過，唐唐落敗已既成事實，肥仔明已經疊埋心水準備做政治公關，近日仲私底下同人講，只要黨友胡志偉可以接棒佢個九龍東嘅議席，佢就可以安心搵真銀。
其實白鴿黨中人做公關都有前例，盧子健就係其中一個，仲發到住山頂大宅，睇嚟肥仔明都係向住呢條路進發喇。