政情：葉劉囡囡入新民黨實習
復活節就到，好多政界中人都會去旅行叉電，但新民黨立法會議員葉劉淑儀尋日就大呻自己四月無假放，事關佢嘅囡囡葉榮欣（Cynthia）五月畢業，葉太要飛去美國見證囡囡戴四方帽嘅難忘時刻，所以下個月要盡量完成手頭上嘅工作喎。
儲兩年經驗讀MBA
葉太囡囡Cynthia喺美國名校賓夕凡尼亞大學（University of Pennsylvania）主修數碼動漫設計，五月畢業戴四方帽，做媽咪嘅當然開心啦。葉太話囡囡畢業返港後會加入新民黨做實習生，儲兩年經驗後就去讀MBA。葉太仲話，Cynthia會喺九月立法會選舉幫手派傳單同嗌口號，吸收實戰經驗。
咪睇Cynthia主修數碼動漫設計，葉太大讚囡囡熱心參與學校事務，喺學校本科生議會內高票當選，兼做埋議長（speaker）添，據聞議長喺學校嘅地位等同立法會主席，咁Cynthia咪勁過淨係做議員嘅媽咪？