政情：煲呔曾賞櫻騰騰震

煲呔曾早前先至被踢爆○九年同金融界立法會議員李國寶坐私人飛機去日本賞櫻花，估唔到佢上咗癮，今年又去賞櫻。不過，今次佢唔敢再用商務客位價錢去坐億億聲嘅超豪私人飛機，但頭等又唔捨得坐，惟有自己出錢坐商務客位，唔通同佢眼中嘅平民坐經濟客位一齊逼咩，而當日就有人目擊佢喺機場候機室等候上機，木無表情。我哋問過特首辦，佢哋就話唔清楚煲呔曾去邊度玩喎。

隨時「他朝君體也相同」

其實賞櫻花必須要喺悠閒同愉快嘅心情下進行，如果處於忐忑、憂心忡忡或惶恐嘅心情下賞櫻就盞嘥錢。好似煲呔曾就係最好例子，佢早前被本報揭發貪盡富豪海陸空款待，搞到被廉署立案調查，依家就連七月一日卸任後都未有容身之所，心情唔忐忑同憂心就奇啦！加上佢身邊嘅「曾朋友」相繼落難，就連佢○五年力邀返政府做政務司司長嘅肥龍都被廉署拘捕，諗起自己「他朝君體也相同」，睇怕佢影櫻花都影到騰騰震囉。

除咗肥龍被廉署拘捕外，早前獲煲呔曾幫到出面嘅舊下屬、前政務司司長唐英年，亦因為婚外情同九龍塘僭建醜聞影響而失落特首寶座，日前要到美國探女兼散心，之後亦可能因僭建問題惹上官司。至於煲呔曾嘅哎吔細佬鬍鬚曾就更加hea住等收工，稍後會放復活節大假，印證夕陽政府唔係貪就係懶。

煲呔曾領導嘅夕陽政府接連爆出連串官商勾結醜聞，而且愈揭愈多、愈爆愈臭，話唔定遲啲燒到煲呔曾頭上都唔出奇，到時真係貪字得個「貧」，隨着新政府上場，相信會係撥亂反正嘅好時機。