中環出更：陳李妮花心思 賀老友牛一
前亞姐冠軍陳李妮（Lily）加入博愛醫院董事局後，愈做愈起勁，今個月起又再冧莊做新一屆副主席。有人冧莊，亦有人落莊，Lily個老友黃小雄（Johnny）就卸任博愛副主席，Lily當然唔捨得啦，佢就趁日前Johnny牛一，約埋大班朋友去幫襯Johnny有份投資嘅銅鑼灣太平洋帆船酒店Hill蠔吧餐廳，順道慶祝生日，大家玩得好盡興。
Lily話，加入博愛之後，最開心係結識董事局一班好朋友，佢同Johnny年紀相若，又啱傾，所以好唔捨得佢離任。當晚負責打理蠔吧餐廳嘅合夥人Kenneth亦在場，佢推介靚蠔、蜆及龍蝦等時令海鮮，道道都係Lily嘅至愛。餐廳嘅生蠔極受客人歡迎，但Lily鍾意熟食，所以柯打咗芝士及辣番茄焗蠔兩味，一樣食到舔舔脷。
蠟燭Tiramisu玩驚喜
甜品向來係女士嘅最愛，Lily都唔例外，笑稱甜品先至係佢嘅主菜。佢叫咗各式各樣嘅甜品，尤其不可錯過嘅係餐廳最拿手嘅Tiramisu。轉頭侍應送上一個點咗蠟燭嘅Tiramisu，原來係用嚟慶祝Johnny牛一，聲稱唔過生日嘅Johnny，對突如其來嘅驚喜大感意外，兩人真摰嘅情誼，盡在不言中。