爽啊！爽啊！名副其實爽死了！皆因阿爽真係氣絕身亡死鬼咗！
阿爽到底係邊個呢？咪就係淫賤黎旗下搞到人人喊打嘅《爽報》囉，呢一份鹹到出汁派通街嘅免費報本來分早版同晚版，不過晚版愈做愈唔對路，分薄資源佗衰家，為免繼續內出血，淫賤黎終於一聲令下即時停印。換言之，《爽報》晚版英年早逝，早逝過叫做英年嗰一個特首候選人。
晚版爽死了，該報死撐話喎，集中火力谷早版，攻陷早版市場，賺到錢後再開拓晚版都唔遲。對於咁嘅講法，大家有乜嘢理解呢？好明顯啦，《爽報》距離賺錢仍然遙遙無期，仲係處於燒銀紙狀態。可想而知，淫賤黎好大可能再一次蝕到眼眅眅。
當然啦，淨係《爽報》晚版死鬼咗未夠o架，最好連早版都盡快瓜老襯，咁就一天都光晒嘞。嗱，唔好話功夫茶咒佢呀，鬼唔望佢徹頭徹尾爽死了其實係一大功德，你知啦，《爽報》誨淫誨盜教壞細路，絕對應該人間蒸發，唔好再荼毒人心。
該報自從去年九月創刊以來，短短幾個月之嘛，影視處就已經收到超過二百幾宗投訴，指摘內容不雅、淫褻同暴力。如果揸正嚟做，影視處係可以告到淫賤大亨甩褲，按照法例完全可以重重罰款甚至收監法辦。不過可惜吖，特區政府充斥牛鬼蛇神，港英餘孽縱容包庇之下，影視處只係將二十六件《爽報》發布嘅物品送審，當中二十三件被淫褻物品審裁處評定為不雅。跟住仲離譜，影視處僅僅提出十一項票控，其餘十二項網上文章聲音版全部放生。十一項控罪之中，法官大人又呵護備至，每項罪名輕輕罰款一萬元算鬼數，合共罰款區區十一萬，問你服未。
更奇嘅係，立法會班政客居然亦自甘墮落，為淫賤黎保駕護航。嗱，前排十八個民間團體齊齊操上立法會，譴責《爽報》賣弄色情，荼毒青少年，點知平時扮晒正義嘅公民黨同民主黨政客裝聾扮啞，變晒鵪鶉。
唉，無計啦，淫賤黎係泛民最大金主，過去分別向公民黨同民主黨捐款過千萬，仲提供私人遊艇畀呢班政客吃喝玩樂，佢哋受人錢財咯喎，又點敢同淫賤黎過唔去吖。
不過咁，功夫茶始終相信，善有善報，惡有惡報，《爽報》晚版摺埋就係惡有惡報，假如早版都摺埋，更加可以證明誨淫誨盜始終會被天收。話時話，如果惡有善報、善有惡報，呢個世界冇人做好事o架喇，香港遲早變成男盜女娼！