政情：蒙民偉事迹搬上舞台
已故「電器大王」、信興集團創辦人蒙民偉嘅創業事迹向來為人津津樂道，最近就有話劇團將蒙叔嘅事迹改編成話劇演出，並得到信興集團副主席蒙德揚（David）贊助支持。
蒙德揚大力支持
話劇內容講述反日情緒高漲嘅五十年代，劇中嘅蒙叔不怕辛苦逐家逐戶拍門推銷日製電飯煲，雖然期間處處碰壁，但佢一直都唔肯放棄，堅持理想，終於令港人開始接受用電飯煲煮飯。
同爸爸一樣樂善好施嘅David話，呢齣話劇係以一碗香飯為契機，道出港人互助互愛、同舟共濟嘅精神，令社會充滿愛與關懷，題材寫實，牽動人嘅心弦，最重要係劇本根據佢爸爸嘅故事改編而成，分外有親切感。David仲話，話劇五月公演時佢一定會去捧場，實行用行動支持本地藝術發展喎。