政情：阿柱唱歌 為Ｎ無伸冤
鬍鬚曾Hea住等收工，整份廢到無倫嘅財政預算案就想蒙混過關，但社福界立法會議員張國柱尋日就話，佢鬧呢個龜縮政府嘅末代預算案，已經鬧到無晒心機，亦唔想重複又重複向呢個看守政府解釋Ｎ無人士嘅苦況，阿柱於是唱出一首改編自賀年歌「祝福你」嘅「Ｎ無人士劏房細」新歌，為Ｎ無人士伸冤，雖然佢唱歌未必好聽，但最緊要係有共鳴。
阿柱大展歌喉，唱出萬千Ｎ無人士嘅心聲，首句係：「劏房細（祝福你），仲有租金貴（在每一天裏），永遠驚會迫遷（永遠多采多姿）」，到中段：「公屋讓我等到無心機（春風為你吹開滿山花），宿位讓你等到已升仙（秋月伴你天空萬里飛）」，相信無論阿柱歌聲如何，Ｎ無人士只要稍為留意歌詞，必定能夠投入其中，齊齊加入聲討鬍鬚曾嘅行列。