政情：王國興「頒獎」寸政府外判
多個政黨都批評財政預算案無支援Ｎ無人士，但工聯會立法會議員王國興尋日喺立法會二讀財政預算案時就無追究呢方面內容，反而對政府部門嘅人手編制唔多滿意，仲即時搞咗個頒獎禮，頒個「外判大獎」寸爆政府。
王國興話，佢向政府部門發咗七十幾個質詢、四十幾條問題之後，發現原來政府對僱員嘅剝削非常嚴重，例如政府產業署嘅外判員工同公務員比例竟然高達九比一，即係九個外判工人先有一個公務員，真係要頒個「外判員工百分比」大獎畀產業署。
至於食環署、康文署亦不遑多讓，喺聘用最多外判員工及非公務員合約員工等項目中打入頭三名。
王國興批評，政府帶頭製造同工不同酬，擺明車馬係剝削員工，同工聯會反外判嘅立場背道而馳，難怪佢尋日愈頒愈火滾。