港鐵以前叫做地鐵，功夫茶記得好多好多好多年前，地鐵嘅宣傳語句大致係咁講：搭地鐵就冇藉口遲到啦。意思即係話，地鐵列車行駛速度夠快，點都好過你喺地面塞車。
時移世易嘞，兩鐵合併咗，地鐵都改名做港鐵咯，速度仲算唔算快呢？不如咁講啦，假如冇事冇幹冇故障，車廂冇冒煙，車長冇飛站，港鐵速度都唔算太慢嘅。之不過咁，唔算太慢只限於列車行駛速度咋，如果以其他服務嚟睇，港鐵簡直慢過烏龜！
呢嗱嗱嗱，千祈唔好以為功夫茶向港鐵發動「人格謀殺」，全世界都知功夫茶並唔係特首候選人，冇必要做出呢一種抹黑行為。港鐵慢過烏龜有事實根據o架，最明顯嘅效率缺失在於安裝月台幕門。喂，都唔知過咗幾多年啦，月台幕門仍然未全部安裝完畢，不斷有人唔小心跌落路軌，再唔係就自尋短見，確係死得人多o架！
安裝月台幕門都慢成咁，你估港鐵加設廁所，需要幾耐時間吖嗱？講出嚟睇怕嚇到大家毛髮直豎，答案係三年至八年！
港鐵嘅官方講法係咁嘅，將會斥資十億元提升車站設施同服務，包括加設洗手間、加裝闊閘機以及增設月台座椅。旺角、太子同金鐘站將於二○一五年底前加設公共洗手間，同時加裝十三部連接車站大堂同地面嘅升降機。至於其餘未有公共洗手間嘅七個轉線車站，將於二○二○年底前加裝。
功夫茶真係想問一問港鐵負責人，因乜解究手腳慢得咁交關呀？香港唔係一個乜都要快嘅國際大都會咩？三年時間，人哋興建一座摩天大廈都夠啦；八年時間，打造一個太空站相信都綽綽有餘；廁所又唔係乜嘢高新科技，馬桶又唔識得提供按摩服務，洗完手又唔會有機械人遞上紙巾，要咁耐時間先至完成加設工程係咪傻o架！生命咁寶貴，冇理由蹉跎歲月浪費青春啫！
講到沒完沒了嘅加裝月台幕門，港鐵終於有一個講法。乘客目前透過八達通每程多付一毫，作為加裝幕門費用，預計二○一五年可以停收。換言之，終於完工有期，不過都要再等三年，唉！
之不過咁，一講到錢，兩眼發青光嘅港鐵負責人就會即刻變得效率十分高超。你知啦，港鐵年年賺大錢，仍然年年要加價，嗰一種搶錢效率真係勁到冇朋友。去年勁賺一百四十七億元嘅港鐵又話，今年六月要加價嘞。
一日最衰都係曾蔭權，淨係掛住傍實富豪貪威識食，政府作為大股東都無法鞭策港鐵真心誠意為港人服務。所以話啫，貪腐問題影響深遠，大貪小貪必須趕盡殺絕！