「世事紛繁，祝君無憂，龍年問候。」呢十二個字係老朽年初問候友好親朋嘅句子，看似簡單，卻不容易。
老朽忽然感慨，一來睇咗昨日「功夫茶」所說的「消費陷阱處處，監管漏洞多多」，尤其投資陷阱無處不在，連啲公公婆婆嘅棺材本都唔放過，「迷債」搞到不少長者血本無歸，欲哭無淚，金融機構唯利是圖，港府監管不力，各部門又唔肯誠意正心去幫啲苦主，仲互相卸責。
「功夫茶」狠批啲不良銷售手法，設下無數陷阱畀消費者踩，老朽最近感受殊深，皆因針拮到肉就知痛！長話短說，老朽幼兒自小有自閉傾向，不善與人交往，性格平實，做保安員，唔識追女仔，只愛健身游泳，練得一身好肌肉，日前幫襯某美容健美中心，喺唔夠一個鐘頭內被「游說」並碌了四萬多元卡數，其中一項就係「簽十五年合約」，碌去近三萬元！阿哥，對一個第一次學玩健身嘅靚仔，咁嘅預繳手法兇狠啲啩？
眼見吾兒不幸做了羊牯，內心「哀其不幸，怒其不爭」，一方面又感慨兒子一向正直魯鈍，被呃似是天經地義，可是，一諗起佢搵嘅係血汗錢，不禁又怒火中燒，於是姑且向本報「投訴版」求助，版主一聽，話呢啲消費陷阱多如恒河沙數，即管試吓向有關方面反映喇。誰知唔夠兩日事情解決，那健身公司悉數退回款項，老朽誠心道謝：有東方，冇惡人！並籲有關當局速立例監管預繳式消費。