民望一直大幅落後嘅特首候選人唐英年，不惜違反行政會議保密制，喺前晚選舉論壇中兩度爆出無法證實嘅「政府高層會議」內容，企圖打擊對手梁振英（CY）嘅選情。CY尋日就搵埋當年有份開行會嘅前教統局局長李國章開記者會高調澄清，李國章除咗證明CY清白外，仲揣測唐唐爆料係幕後有人教路嘅，佢好心提醒教唐唐嗰個人，唐唐今日出得嚟爆行會嘅嘢，恐怕將來會爆埋係邊個教佢去抹黑人。
