夕陽政府仲有三個多月就收檔，究竟邊啲現任司局級官員可以留任下屆政府、邊啲會趁機跳船，相信佢哋自己心中有數。為官向來中規中矩嘅運輸及房屋局局長鄭汝樺（Eva），尋日出席電台節目被問到會否留任下屆政府時，佢坦言人生一定有唔同嘅階段，但同乜嘢人合作、做乜嘢崗位都係次要，最重要嘅考慮係睇吓家人有乜意願喎。
過去一直有消息話Eva唔想留任下屆政府，適逢佢尋日上電台講規管一手樓銷售政策，於是被問及去留問題。Eva話自己服務市民近三十年，往後點發展，呢個係人生嘅鋪排問題，強調好清楚自己想要啲乜嘢，而未來路向一定要同家人有共識。被問到有冇特首候選人搵佢加入下屆政府，Eva話，三個候選人佢都認識，唔係咁適合喺公開場合透露內容喎。