政情：立會餐廳外賣 柯打前諗一諗
潮流興環保，大家都鼓勵減少因外賣衍生嘅塑膠餐具同膠袋，但對於分秒必爭嘅立法會大樓使用者嚟講，好多時身不由己要叫外賣食，隨着立法會餐廳嘅外賣送遞服務喺明日投入服務，相信可以畀大家多一個選擇，但究竟會否因而「因福得禍」，令立法會成為唔環保嘅地方呢？
為環保出分力
添馬艦立法會新大樓去年十月入伙之初，新大樓餐廳一度因招標問題令一眾議員同議員助理無啖好食，惟有四出到附近食肆覓食，等了又等，相對價廉物美嘅餐廳終於喺一月初正式投入服務，據聞明日開始仲有外賣送遞服務畀大樓使用者添。
不過，正所謂針冇兩頭利，有外賣送遞服務無錯係可以方便大樓使用者，但分分鐘會增加大家叫外賣嘅意欲，自然用多好多膠袋同塑膠餐具，同環保理念背道而馳，奉勸大家為咗喺環保出一分力，叫外賣前應該諗清楚，係咪真係忙到落去餐廳食飯都無時間呢？