政情：曾鈺成博流選執死雞？
國務院總理溫家寶日前開腔，強調只要選舉堅持公開、公正、公平及嚴格依法辦事，定能選出一個「為多數港人所擁護的特首」，立即引起各方解讀。除咗有講法話溫總想曲線挺梁、暗示唔想流選外，曾經講過會喺流選後參選嘅立法會主席曾鈺成，尋日又出嚟解讀領導人嘅意思，話「流選」都係依法辦事，莫非佢想借領導人把口鼓吹流選，等自己有機會執死雞參選？
曾鈺成尋日喺電台節目上話，熟悉中國政治文化嘅人都知，領導人講嘢粒粒字都秤過，例不虛發，所以解讀領導人發言要全面，唔可以睇啲唔睇啲喎。咁點先至叫解讀全面呢？佢話，中央相信特首選舉「定能」選出特首，的確係無錯，但必須有兩大前設，一個係堅持「公開公正公平」，即係唔准搞陰謀詭計，要光明正大，同埋唔好畀個人利益、偏見私利蒙蔽，要顧全大局。
明示唔會秋後算帳
第二個前設就係「嚴格依照法律程序辦事」，但至於乜嘢叫依照法律程序，曾鈺成就有另一番解讀。佢陰陰嘴笑住分析話，特首候選人要取得六百零一票先有資格做特首，否則六星期後就要重選，呢個機制係去年經過立法規定嘅，即係溫總口中所講嘅「法律程序」，所以到時就算要流選，都係喺法律程序框架下進行，叫大家唔使擔心流選即係違法喎。
曾鈺成解讀到尾段，話唔贊同選委動員其他人去投白票，因為咁樣等同鼓吹流選，但另一方面又話投白票唔係乜嘢大問題，只要每個選委知道自己做緊乜就得，就算投白票，都唔會係唔負責任嘅行為喎。雖然佢咁嘅講法好矛盾，但好明顯係明示畀啲選委知道，就算投白票都唔會激嬲北大人，唔會畀人秋後算帳嘅。
究竟曾鈺成嘅講法係咪真係北大人所想，真係上面先至知，但大家咪忘記，流選最大得益者一定係佢，佢咁樣「曲線」鼓吹投白票，到底係咪為自己執死雞鋪路，確實係司馬昭之心，路人皆見，相信公眾自有判斷。