中環出更：駿駒拍賣 名人得心應手
沙田馬場尋日舉行馬匹拍賣會，唔少名人馬主都有去競投。卓妮見到香港馬王「好爸爸」馬主袁仕傑，以五百萬元投得一匹美國駿駒；康泰旅行社老闆黃士心都唔執輸，豪擲六百五十萬元投到一匹同本港名駒「蓮華生輝」同父系嘅澳洲名駒。同場仲有仁愛堂副主席歐雪明 （Clarea） 密密舉手，最後以三百七十萬元，投得新西蘭靚駒「Keeper」。
Clarea首次以個人名義做馬主，喜上眉梢，佢話好滿意個價錢，仲即刻同囡囡Natasha諗定馬名，打算命名為「Dragon Keeper」。
顏金煒：自己買着數啲
除咗呢匹馬之外，Clarea仲抽到兩個限額，加埋現有嘅兩匹團體馬「中國好」同「速度快」，將會有五匹馬在手。問Clarea揀馬有乜秘訣，佢話多數會睇匹馬嘅身形、毛色、肌肉，但最重要都係合眼緣喎。
卓妮又遇到保良局副主席顏金煒同囝囝Martin，佢哋齋睇無買，因為話無籌養馬喎。
顏金煒本身有匹愛駒「必勝精神」，係去年專程到澳洲購買嘅，只係花咗二百萬港元，但今次拍賣會最平嗰匹都以二百二十萬元成交，佢笑笑口話，拍賣當然貴啲啦，所以自己買咪着數啲囉。
另一位出晒名愛馬嘅保良局副主席鄭錦鐘同太太都有入場湊熱鬧，佢都話冇晒限額買馬，但都會嚟收吓風，了解市場價格，等第日要買馬，心中都有個數喎。
卓妮