呢一個蠱惑香港仔曾蔭權真係愈睇愈心術不正，經過東方報業集團連環獨家踢爆貪腐醜聞之後，佢再被揭發誠信缺失、官商勾結嘅劣行，真係日日新鮮日日甘。
煲呔曾今次被揭發嘅劣行係咁嘅，呢一個貪威識食嘅「離岸特首」去年四月夥同富豪劉鑾鴻等人，秘密去澳門吃喝玩樂自由行，一行三人其中一個節目係參觀當時快將開幕嘅新賭場銀河渡假城，回程又係乘搭富豪名下嘅超級遊艇。之所以話行程秘密，原因係特首出門三日兩夜居然冇刊登憲報！
特首辦死撐話喎，由於外遊澳門僅僅係短期性質，所以毋須刊憲。呢家嘢真係呃鬼食豆腐，三日兩夜都叫做短期性質？翻查政府憲報，曾蔭權○五年出任特首以來，三日或以下離開香港公幹或休假，總共四十次刊登憲報，當中五次係即日來回短途行程。既然即日來回都刊憲，因乜事幹三日兩夜去澳門就唔刊憲呢？好明顯啦，拍住富豪把臂同遊唔想人知吖嘛，所以就鬼鬼祟祟出境入境嘞。
各界人士質疑特首同富豪過從甚密涉嫌官商勾結利益輸送，「曾小人」喺本月初出席立法會公審嘅時候辯解，嗰啲富豪係「一般朋友」咁話喎。喂，曾蔭權身邊來來去去都係嗰幾個富豪朋友，尤其係劉鑾鴻，淨係曝光嗰幾次，次次去澳門都同煲呔有影皆雙，咁都算一般朋友？唔好當全人類嘅智商都等同於姓唐嗰一個龍豬先得o架！
貪曾醜聞長揭長有，再次證明離岸特首並非浪得虛名。既然咁鍾意神神秘秘出埠鬼混，試問煲呔曾又有乜可能兌現競選承諾「我會做好呢份工」？難怪上任七年以來一事無成搞到怨聲載道，民生問題樣樣未解決。就好似雙非孕婦來港產子咁吖，又好似骨灰龕位長期嚴重不足，再好似劏房住客日日提心吊膽憂慮葬身火海，曾蔭權幾時有正視過？幾時有認真處理過？仲未計貧富懸殊造成社會深層次矛盾，過百萬貧窮大軍日日睇住離岸特首「曾門酒肉臭」，個個擔心自己變成「路有凍死骨」，嗰一種不滿情緒隨時爆到五顏六色！
唉，好心貪得無厭嘅曾爵士早抖啦，自動自覺滾落台咪可以長時間出埠鬼混囉，冇必要遮遮掩掩做一個偽君子吖嘛。之不過咁，自動自覺滾落台唔代表免受刑責喎，萬一廉署調查貪污瀆職證據確鑿，退休離岸特首都要回岸接受審訊o架，唔好企圖潛逃海外，如果由「氣候逃犯」變成「貪腐逃犯」就失禮列祖列宗啦！