政情：立會選舉「兔仔」議員有暗湧
立法會選舉鐵定喺九月九日星期日舉行，據《通勝》所講，農曆七月廿四日同生肖屬兔嘅人相沖，對於一眾屬兔而又想競逐連任嘅立法會議員嚟講，當日嘅運程對佢哋相當不利，雖然未知係咪會影響佢哋成功連任，但既然沖生肖，相信選情會遇到唔少阻滯。
強敵挑戰李國寶
喺現屆立法會嘅議員當中，有九位議員都係生肖屬兔，包括三九年出世嘅金融界李國寶同工程界何鍾泰。出名「三點不露」嘅李國寶喺立法會嘅表現向來麻麻哋，被封「大懶蟲」稱號，依家港區全國人大代表吳亮星話會積極考慮參選金融界功能組別，面對強敵嘅挑戰，李國寶嘅地位分分鐘不保。
51年出世特別多
至於五一年出世嘅議員就有六位咁多，建制派方面包括民建聯葉國謙及黃容根、經濟動力梁君彥，而泛民主派代表就有民主黨何俊仁、人民力量黃毓民及社福界張國柱。
而六三年兔年出世嘅就有民主黨嘅涂謹申，佢嘅生肖同選舉日有相沖，唔知佢出戰立法會超級區議會議席會唔會好似之前參選區議會選舉咁順利呢？