政情：田少投白票 膽博膽
特首選舉已進入倒數關鍵時刻，傳聞近日北大人再派說客來港收風兼放風，除咗表明唔想選委投白票釀成流選外，仲有另一個重要訊息，就係提到今年九月立法會選舉，建制派喺多個選區都大混戰，需要中央協調。北京說客咁講，即係擺明向選委暗示，投白票者實喺立法會選舉無運行，但睇嚟有人真係諗住膽博膽抗旨嘅，其中一個就係自由黨榮譽主席田北俊。
「幾乎絕對」含義不清
京城派人南下收風唔係新鮮事，但喺北京兩會尾聲之際先至再派人收多一轉風，明顯係有新訊息想表達，關注嘅唔單止係唔想特首選舉流選外，仲關注如果建制派喺立法會選舉唔好好協調，只會畀泛民主派有機可乘。此風一出，難免令人聯想到，係咪北大人暗示喺特首選舉中投白票者，就會喺立法會選舉中「被協調」，不獲中央出力撐腰呢？
提名特首候選人唐英年嘅田北俊，自唐唐婚外情及大宅僭建醜聞後，曾經話考慮會投白票，到咗尋日就進一步話會「幾乎絕對」投白票，仲話流選機會率有三成咁高，似乎無將北大人意思放在眼內。不過，「幾乎絕對」究竟係「幾乎」定係「絕對」，睇嚟只得田少自己先至知。
田少諗住循新界東重返議會已經係公開嘅秘密，但新界東選情偏偏七國咁亂，淨係建制派都已經好多人爭上位，既有獲地區人士撐腰嘅沙田區議員龐愛蘭、又有「奇兵」西貢區議員方國珊。如果鄉事派又出另一條隊，田少重返議會嘅機會實在唔高，最終都係要北大人協調。如果北大人因為田少投白票而唔「祝福」佢，睇嚟佢都幾難當選。
有分析話，田少之所以夠膽「抗旨」投白票，相信都係兵行險着，因為繼續撐唐等於逆民意而行，對個人選情及整個自由黨選情都不利。相反田少細佬田北辰就好識走位，唔止話唔投白票，仲話一定唔會投畀唐唐，而係傾向支持梁振英喎。