中環出更：鄺英志留戀1981
香港人鍾情歎紅酒，世界各國酒莊紛至沓來。西班牙裏奧哈區（Rioja）六十個酒莊，日前聯袂喺尖沙咀The Mira酒店舉行品酒會，吸引一眾城中劉伶現身試酒。卓妮都去湊熱鬧，見到星級品酒師鄺英志（Peter）同老友們滿場試酒，十分盡興。咁多靚酒當前，Peter對Osborne酒莊出產嘅Montecillo一九八一年份特選紅酒讚不絕口。
Peter話，一九八一年至今已經有成三十一年，咁耐年份嘅靚酒已經買少見少。此酒入口充滿果香，口感成熟，色澤又靚，整體感覺實在冇得彈。
每支$400以下 大讚抵飲
專門代理西班牙產品嘅本港入口商已取得代理權，即場透露售價每支四百元以下，Peter聽罷睩大對眼，猛讚好抵飲。
Peter話，西班牙裏奧哈區葡萄酒嘅最大特色，係堅持用木桶釀造，可以話係世界上最奄尖嘅國家。
何耀康忙推廣本地企業
卓妮同場又見到香港葡萄酒商會會長何耀康（Henry）及副會長蕭俊文，Henry話，最近忙緊到內地城市推廣香港葡萄酒企業，並以統一品牌及專業化形象參展，希望吸引內地消費者及採購商嘅注意喎。
卓妮