最近比較多江湖恩怨，既有江湖人物，又有江湖飯局，講到會影響特首選情咁巴閉，亂七八糟都唔知信邊個好。功夫茶忽然之間諗起一條江湖規矩：出得嚟行，預咗要還。
呢一條江湖規矩幾有意思o架，絕對符合中國傳統智慧，就係善有善報、惡有惡報吖嘛。簡單咁講，你做錯事咩，唔該你承擔責任。如果你信善惡報應，你大概都會相信「貪字得個貧」。
講咗咁耐，功夫茶無非都係要指出，貪腐醜聞纏身嘅曾蔭權，出得嚟行，一定要還，唔還就對唔住全人類，更加對唔住曾家祖宗十八代，九泉之下都冇眼睇呢一個不肖子孫。冇嘅，煲呔曾作為「香港第一貪官」，傍住富貴一族享受海陸空高檔款待，仲要夠膽死喺深圳企圖入住「窮奢極侈廉租屋」，到咗今時今日都唔肯引咎辭職執包袱落台，你話係唔係冇天理吖！
貪曾唔止喺香港淪為人人喊打嘅「曾小人」，醜事出門傳千里之後，海外人士不分國籍同樣嘩然，犯眾憎犯到蜚聲國際。好似台灣咁吖，立委陳學聖就話嘞，曾蔭權事件如果發生喺台灣，就算政府廉政單位唔主動查辦，民間公民團體同媒體監察力量都會要求佢落台。台北市議員林瑞圖亦認為，曾蔭權嘅行為屬於集團性貪腐，同台灣過氣總統陳水扁當初不相上下。即係話，台灣政客將煲呔曾視作「港版陳水扁」，你話幾咁羞家呢！
大家又睇睇南半球嘅澳洲，由香港移民去澳洲悉尼嘅市議員黃紀炎，直斥曾蔭權打擊公務員誠信，衝擊香港嘅國際形象，海外投資都會受影響。
至於世界各地嘅倒曾反應，英國呀，美國呀，法國呀，請恕功夫茶唔同大家囉囌，有興趣不妨揭去本報《探射燈》細閱詳情。功夫茶想同大家研究嘅係，貪字得個貧會唔會係真嘅呢？如果係真嘅，貪曾何時變貧曾？你知啦，機關算盡太聰明，聰明反被聰明誤，自作聰明嘅「港版陳水扁」家陣就話舔盡便宜啫，遲啲有可能變得一無所有喎。如果已經立案調查嘅廉政專員公署不畏強權……嚴格講應該係「不畏蔭權」秉公處理，真係監都有得你坐o架！
嗯，功夫茶想像力比較豐富，腦海裏面即刻見到一幅圖畫，畫中人搖頭晃腦對住鐵窗喃喃自語：貪曾出得嚟行，貧曾預咗要還；貪曾出得嚟行，貧曾預咗要還；貪曾出得嚟行，貧曾預咗要還……
點都好啦，香港廉潔奉公嘅乾淨形象已經被貪威識食曾蔭權一鋪清袋，麻煩廉署真係要為民除害打大老虎，否則香港人一個二個大叫：「瓦努阿圖，我想移民嘅地方！」咁就令人無地自容嘞！