政情：劉靳麗娟擠時間服務婦女
香港女人出名叻，剛上任做婦女事務委員會主席嘅劉靳麗娟（Stella），就係最佳「人辦」。Stella本身係女拔校長，做婦委會一姐後，一日廿四小時都未必夠用。兼顧事業、家庭與公職，佢話秘訣係努力擠出時間來。
婦委會早前慶祝三八婦女節，菁英會菁英幗聚主席林玉茵、青聯賢慧社主席羅詠詩齊撐場。接替高靜芝嘅Stella擔大旗主禮。Stella話，婦女地位仍有進步空間，佢尤其希望幫助少數族裔及新移民婦女，近日忙於將教學課程翻譯成英文及普通話，等佢哋學多啲，加快融入社會。
同場仲有平等機會委員會主席林煥光（WK），講起婦女地位，WK自認係小男人，佢自爆卅年前已加入「住家男人」行列，最叻幫老婆洗碗，洗足卅年仍未厭。猶記得WK曾因「感情缺失」鬧到滿城風雨，如今喺太太身邊乖乖洗碗，可謂浪子回頭金不換！