政情：貪曾欲赴加投靠細佬
自作孽，不可活。煲呔曾留低大把手尾未解決，但佢只識自己顧自己，老早租定深圳嘅「禮賓府」作為退休後居所，過其印印腳嘅奢華生活。點知落得個臨尾香，被東方報業集團揭穿佢嘅圖謀，最終落得個無處容身嘅下場。尋日有傳聞話已經淪為過街老鼠嘅煲呔曾走投無路，身為家中長子惟有諗住投靠遠在加拿大嘅細佬，若然實屬，真係早知今日，何必當初！
縮骨算爆無處容身
縮骨算爆嘅煲呔曾為官多年鑽盡空子刮埋唔少，點知天網恢恢，深圳「禮賓府」畀《東方日報》同《太陽報》圖文並茂踢爆之後，全港嘩然，喺無路可走之下，只能退租。早前佢出席立法會答問大會，就懶可憐咁話自己七月一日之後何處容身，仲未有着落。
煲呔曾肯定住唔慣細屋o架啦，大屋又未必有人敢再租畀佢，加上佢嗰個又係畀東方報業集團踢爆有僭建嘅麥當勞道豪宅租約未滿，相信今年七一煲呔曾下台之後，香港已經無佢嘅立足之地。尋日有傳聞話，身為家中長子嘅煲呔曾為免同老婆變成露宿者，正打算投靠居於加拿大嘅三弟曾蔭煊同埋五弟曾蔭荃。煲呔曾呢兩位細佬，同曾經做過警務處處長、現任新創建執董嘅二弟曾蔭培，以及現任渣打香港主席嘅細妹曾璟璇唔同，較少香港人認得。有指曾蔭煊同曾蔭荃喺加國創業，專門做煉油設施，要照顧無處容身嘅煲呔曾理應不成問題。
去瓦努阿圖諗得過
其實加拿大咁多香港人，死性不改嘅煲呔曾去到加拿大又再行差踏錯，肯定有好多港人睇唔過眼越洋打佢小報告，到時連累埋兩位細佬於心何忍？當然煲呔曾可以返外家，投靠老婆曾鮑笑薇喺澳門嘅家人，但澳門同樣好多港人，所以此路不通。我哋就有個小建議，依家唔少廣告推介位處太平洋、鄰近澳洲嘅瓦努阿圖，相信嗰度真係無人識得煲呔曾，至少嗰度唔怕連累其他人，煲呔曾不妨考慮吓，自己養吓雞，種吓菜，划吓艇仔就當坐豪華遊艇囉。
上等政客就名留青史，中等政客被歷史遺忘，下等政客則遺臭萬年，煲呔曾屬邊類，大家心照不宣啦。