中環出更：甘健成三仔爺 齊歎魚蛋粉
鏞記老闆甘健成近日捲入酒家母公司清盤案，心情麻麻，見到靚燒鵝都食唔落，寧願換吓口味，食碗粉。筲箕灣東大街安利大牌檔，原來都係甘老闆嘅心水，卓妮有晚見佢拉埋兩個仔崇軒及崇轅去「醫肚」。時值黃昏六點，個天落起毛毛雨，安利內人唔算多，三人一去到就有位。
三仔爺甫坐低，甘老闆以熟悉嘅口脗柯打三碗招牌魚蛋粉，崇軒就整多一支可樂。雖然貴為酒家大老闆，但甘老闆未要求特別款待，三仔爺就好似普通食客一樣，圍埋一枱坐。期間邊食邊閒話家常，樂也融融。但未知是否受官司影響，甘老闆全程笑容唔多，似滿懷心事。
廿分鐘後，三人食飽飽離去，兩個仔先步出門口截的士，甘老闆就殿後找數。卓妮上前打招呼，問甘老闆係咪嚟呢區睇舖位，佢就急忙澄清話：「唔係，唔係！嚟呢度食碗粉啫！」卓妮日前喺另一場合遇到甘崇軒，佢話差不多成條東大街都食勻晒，但安利就第一次幫襯。