中環出更：幽默純官嫁女 真情剖白20分鐘
新世界發展主席鄭家純嫁女，喜訊熱爆社交圈，超豪喜宴前晚喺女家地頭嘅會展舉行。外父純官好幽默，喜宴上致詞時，講明全晚酒席及紅酒，統統由新郎哥龐建貽（Paulo）埋單，畀足面男家。
純官為氹愛女鄭志雯（Sonia）開心，前晚喺婚宴上真情剖白近廿分鐘，句句精警。佢直言好驚囡囡婚後炒佢魷魚，投身家庭主婦行列，提議囡囡放五年假，生夠七個後，隨時返公司幫手。查實Sonia熱愛工作，點捨得揼低家族生意？
純官又爆囡囡愛Shopping，一次過買十幾對鞋，希望新郎哥多多包容，認真風趣。新外父又不忘傳授夫妻相處之道，話嘮叨係女人天性，男人聽見太太「依依哦哦」，一定要忍喎。
龐建貽求愛求婚施冧招
Paulo亦喺婚宴上大爆求愛嘅經過，原來秘密全靠一個果籃。話說兩人相識後首個情人節，Paulo突然送上一個生果籃，內有菠蘿、蜜瓜及一條鯉魚，Sonia諗極都唔明箇中意思，後經友人解畫，先知「菠蘿」諧音係「Paulo」，即是龐嘅洋名；「蜜瓜」與「掛」係諧音，「鯉魚」就代表「你」，加埋就係：「Paulo掛住你。」咁浪漫，女方唔冧就假，自此Sonia芳心暗許。
求婚當日，Paulo亦盡顯情聖本色，花了兩年時間搵到一粒完美無瑕嘅鵝蛋形鑽石，然後約Sonia上山頂求婚，橋段十足童話故事，Sonia又點會唔冧呢？龐鄭兩家門當戶對，卓妮都恭祝佢哋白頭偕老，甜甜蜜蜜。
卓妮