風波不絕嘅香港電台又有人事變動，副廣播處長梁松泰尋日最後一日返工，有傳佢將會調升去政制及內地事務局，接替現任副秘書長何建華嘅職位。
梁松泰升職，接任人選亦已經定出，政務官戴淑嬈已經正名做「候任副廣播處長」，最快本月二十日上任。
據聞廣播處長鄧忍光一度想挽留梁松泰，但因為今次梁松泰係升職，為免阻人發達，只好忍痛批准好幫手調走。
另一方面，做咗副秘書長好幾年嘅何建華仕途亦更上一層樓，有傳佢會接替退休嘅麥綺明，出任行政署署長，職位由首長級第四級升到第六級。
有人漏夜趕科場，自然有人辭官歸故里。有人話退休嘅麥綺明呢幾年工作表現麻麻，新政府總部入伙出現甩漏更加係佢仕途上嘅一大污點。仲有呀，當日負責將特首納入《防止賄賂條例》規管範圍嘅正係麥綺明，煲呔曾近日爆出貪瀆醜聞，但最終原來係無王管嘅，麥綺明係咪應該負責呢？唔係佢又係邊個負責呢？