政情：阿Paul質梁家傑食死貓
立法會保安事務委員會尋日討論內地孕婦來港產子問題，有議員就關注有人喺香港生完仔，然後將出生證件畀其他內地BB過關來港，問入境處能否分辨。
旅遊界議員謝偉俊（Paul）就跟進問題話，啲BB咁似樣，如果有人有心「狸貓換太子」，真係好難分嘅，好似涂謹申同梁家傑嗰兩個BB咁，都好難分到啦！
眾所周知阿涂個BB去年底先至出世，依家得幾個月大，但梁家傑啲仔女就已經好大個，最近又無聽聞佢添丁，所以搞到阿涂都百思不得其解，於是即刻加把嘴話：「梁家傑個仔好大個喇喎！」阿Paul自知擺咗個大烏龍，提問完即時澄清，其實佢講嘅係啱啱上月生完BB嘅醫學界「怪醫」梁家騮至真。
阿涂聽完阿Paul解釋後，就笑笑口話：「咁就差唔多！」引來席上傳來一陣笑聲。其實口岸執法人員認唔認得阿涂同梁家騮個BB唔係最緊要，只要兩個爸爸唔好搞錯就得喇！