中環出更：蔡李惠莉買跑鞋健身
貪靚係女士們嘅天性，好似玩具大王蔡志明太太蔡李惠莉，就經常到金鐘同中環一帶行街Shopping。卓妮上周二行過金鐘太古廣場時，就見蔡太喺一間店舖買鞋，但佢買嘅唔係高跟鞋，而係跑步鞋。蔡太試鞋時對住塊鏡左擰右擰，試到啱心水為止，最後揀中一對紫白色相間嘅跑步鞋，睇落都幾搶眼，佢話要買對新鞋配合佢嘅健美運動喎。
不過，蔡太話買鞋並非只着重外表，而係揀連健身教練都着嘅氣墊跑步鞋，佢於是蕭規曹隨買番一對，希望每個健身動作都做到最好。
原來蔡太擁有健身中心會籍多年，但始終未有認真咁去做運動，近日發覺自己嘅運動量太少，於是「的起心肝」，搵咗個教練一對一指導，並決心每次運動最小要做半個鐘以上，務求要出一身汗，舒展吓啲筋骨，令體魄保持最佳狀態喎。