中環出更：囝囝閃婚 黃家和催「造人」
餐飲聯業協會會長兼廠商會常董黃家和（Simon）尋日榮升老爺，公子黃浩鈞（Howard）與燈飾公司太子女陳嘉琪（Iris）閃婚，喺尖沙咀洲際酒店筵開近六十圍。Simon開到口恨抱孫，催促一對新人努力「造人」，望抱番個精靈龍B喎。
Simon娶新抱，飲食界老友紛到賀，除咗鏞記酒家甘健成大仔甘崇軒，仲有別府麵館執董呂惠全等。廠商會亦陣容鼎盛，會長施榮懷、前會長黃友和、李錦記太子爺李惠中，以及一眾青委成員都拉隊恭賀，施會長更送上大批二鍋頭酒恭賀一對新人。
無翅婚宴 賓客讚好
Simon全晚滿場飛敬酒，十足自己結婚咁high，佢大讚新抱氹得佢好開心，不時帶佢四圍食好嘢，所以兒子拍拖半年話要閃婚，佢舉腳贊成。尋日仲將家傳之寶嘅玉珮送贈兒子，新抱就送上鑽石手鏈。話晒做飲食出身，新老爺Simon對菜單好講究，要求只上「六道菜」，減少廚餘，又減去魚翅，推動無翅婚宴，賓客齊聲讚好。
席上高朋滿座，新郎哥嘅新知舊雨聚首一堂，包括恒生新抱何倍倩（Anina），原來佢哋兩個係喺加拿大多倫多讀High School時嘅同窗，Anina大爆「那些年」往事，稱讚Howard讀書年代係乖乖學生，氹得老師好開心，每次當同學舉手話要去廁所，老師都唔畀，惟獨批准Howard一個去，佢諗起都覺得好笑喎。
卓妮