龍女士（文員）：「釋法都叫做可以解決雙非問題嘅，有咩方法就用咩方法，其實依家先嚟處理，太遲添呀，我自己個ＢＢ依家都卅五周，好彩早搵到私家醫院床位，如果唔係都幾麻煩，當局應該早啲解決問題啦！」
梁先生（醫護）：「今次最好唔好頭痛醫頭，腳痛醫腳，見到有咩漏洞，一次過處理晒佢啦，其實莊豐源案已經提咗政府要處理啦，政府有責任，當年濫用法律機制嘅人亦有問題。」
麥太（家庭主婦）：「根本政府就喺度等收工，唔好話釋法，其實一早就有好多行政措施可以做，但政府都冇做，至於釋法嘅話，如果解決到雙非問題，當然贊成啦！」
