呢個世界有樣嘢叫做小罵大幫忙，亦有樣嘢叫做假懲罰真放生，唔明？睇吓港英餘孽點樣包庇淫賤黎，你就明白晒嘅喇。
話說壹淫媒旗下免費報《爽報》賣弄色情，荼毒社會，去年一獻世立即成為過街老鼠，當局短短幾個月就收到二百幾宗投訴，除咗累積多達二十三項被淫審處評為二級不雅紀錄，影視處亦已向《爽報》提出十一項發布不雅物品嘅票控，真係前無古人，後無來者。好喇，呢十一項票控尋日終於有結果喇，你估法官點判吖喇？唉，真係唔講猶自可，一講把鬼火，雖然《爽報》全部認罪，但總共只係罰款十一萬元咁大把，即係每項控罪罰一萬元，你話係咪搞笑吖！
法官講得頭頭是道，指涉案文章已超越引人性興奮嘅界線，實不應出現喺一份包括小童都可以輕易接觸到嘅報紙之中喎。但功夫茶諗極都唔明，既然法官大人講到咁嚴重，點解又判得咁輕呢？根據《淫褻及不雅物品管制條例》，凡係發放不雅物品，首次定罪最高罰款四十萬元及監禁一年，再犯可判罰款八十萬元及監禁一年。而就算唔計《爽報》呢二十三單畸士，壹淫媒旗下刊物咁多年來違例百幾次，可以講係積犯中嘅積犯，次次都係罰款一萬幾千，幾時見過重罰吖？幾時又見過有人坐監吖？唔怪得有人話香港法治已死，港英餘孽有例不依，對淫賤傳媒假懲罰真放生，法治唔死至奇。
所以啫，如果話冇人包庇淫賤黎，細路仔都唔信喇。即係咁，有人賣淫，通常就有人護淫，就好似古時候有妓女，就有老鴇一樣，嗰啲包庇淫媒嘅餘孽簡直就係現代老鴇，佢哋着埋同一條褲，同一個鼻孔出氣，又點可能重判吖！
話時話，港英餘孽與淫賤黎固然狼狽為奸，其實立法會嗰班政客亦係一擔擔嘅咋。呢，早前十八個團體出席立法會一個聯席會議，炮轟《爽報》內容不雅，荼毒青少年，點知出席會議嘅二十四個議員只有六人舉手發言，平時滿口仁義道德嘅公民黨及民主黨更只得余若薇一人發言，而且顧左右而言他，連《爽報》兩個字都唔敢提及，淨係以「某一份免費報紙」形容，簡直虛偽到極。咁又難怪嘅，淫賤黎係公民黨及民主黨最大金主，佢哋受人錢財，替人消災，惟有出賣正義，連自己靈魂都賣埋囉！
不過咁，多行不義必自斃，壹淫媒誨淫誨盜遲早天收，而包庇淫媒嘅餘孽及政棍亦終有一日會受到懲罰。呢，尋日又有團體遊行抗議《爽報》等不良傳媒鼓吹色情，扭曲女性價值，要求當局正視。呢啲就叫做民意喇，任何人與民為敵都唔會有好下場。善有善報，惡有惡報，時候一到，一切都報，睇路吖！