劉吳惠蘭去年四月以健康理由辭任商務及經濟發展局局長，夕陽政府曾經努力搵人接任，但最後冇人肯接呢個燙手山芋下，惟有搵原為副局長嘅蘇錦樑（Greg）「廖化作先鋒」頂上。不過，Greg蘇上任似乎無乜好戲，尋日又蝦碌叫錯下屬海關關長張雲正做「關雲正」，同三國大將「關公」關雲長只係一字之差，莫非Greg蘇開開吓會雲遊，廖化上身憶「關公」？
立法會一連第三日開財務委員會特別會議，到下午討論工商及旅遊業時，有議員關心同海關相關嘅課題，Greg蘇就求之不得將個波交畀下屬海關關長張雲正，但點知佢開口夾着脷，將張雲正個名叫錯做「關雲正」，連部門首長個名都唔記得認真慶爆。不過，嚴格嚟講，海關隸屬於最少三個政策局，唔知其他兩位上司又會否記錯張雲正個名？