政情：麥拎拎剖析門常開風水差
近期喺年輕人網站頻頻扮嘢嘅立法會議員陳淑莊（Tanya），繼上次模仿美國歌手Lady GaGa，變身成Lady渣渣諷刺時弊後，呢期又有新搞作，分別扮演新聞之花方渣渣及玄學家麥拎拎，借新政府總部風水寸爆煲呔曾貪盡海陸空，仲剖析特首候選人唐英年連串醜聞嘅「內情」。
片中嘅麥拎拎話，新政府總部叫「門常開」，概念好就係幾好嘅，但係道門開正北面，所以雙非孕婦、自駕遊咪湧晒入嚟囉！
鏡頭一轉，佢算到門常開係一道水門，所以大樓一開啲水就播菌，更將醜聞傾巢而出，好似煲呔曾被揭發有遊艇門、豪宅門、包機門，仲有唐唐嘅地庫門等。
麥拎拎仲剖析話，「門」字中間兩戙移開就變成「鬥」字，市民夾喺中間就變成「鬧」字，搞到門常「noise」有排煩喎。佢仲話，唐唐之所以搞到一身蟻，原因係唐宅挖空咗，好易畀人架空，地牢咪用嚟裝地下情囉！至於化解方法只有一個，就係全民喺佢地牢鋪滿蒜頭，「鋪蒜」咪即係普選囉。